zur Navigation springen

Platt Snack : Dat Målbauk för utwassen Lüd

vom
Aus der Redaktion der Zeitung für die Landeshauptstadt

Gaut för dei Seel von Minschen, dei tauväl üm dei Uhren hemm’

Nu in’t 21. Johrhunnert gifft dat nich blot Målbäuker för Kinner, dei noch nich läsen un schrieben kœnen, sonnern ok för utwussen Lüd. Up denn Infall tau disse Målbäuker keem Johanna Basford (Johrgang 1963), dei in Schottland tau Hus is un hüt noch dor läwt. In ehr Studium hett sei sik mit dei Bemålung von Däuker un Tapeten befåt, künn dormit œwer nich nauch verdeinen un füng an, Målbäuker för utwussen Lüd in’n Hannel tau bringen.

Twei Bäuker, „Secret Garden“ (deutsch: „Mein verzauberter Garten“) un „Enchanted Forest“ (deutsch: „Mein Zauberwald“), warden tau Milljonen verköfft un Johanna Bastford steiht ganz båben up’e „Bestsellerlist“. Disse Fru hett dat schafft, ut utwussen Lüd wedder Kinner tau måken, die sik nich blot Planten un Dierten in’n Bauk ankieken mœten, sonnern sei nå ehr eigen Vörstellung utmålen kœnen. Un dei utwussen Lüd ward verklort, dat disse Malbäuker von Johanne Basford gaut sünd för dei Seel von Minschen, dei tauväl üm dei Uhren hemm’, schwore Lasten up sik nähmen un sik dorbi sülben vergäten, sik nich so wichtig nähmen un sik ’n lütten Knacks tautrecken.

Dat Geschäft von Johanna Basford is ok taun Geschäft för dei Verköper in männig Tiedungsbaud worden. Klauke Lüd, dei sik mit dei Spyche von Minschen befåten, seihn in disse Målbäuker ’n Wunnermiddel dorgägen, dat dei Minsch dat nich in’n Kopp kriecht orrer sogor as ’n Remäd’, wenn hei dat all in’n Kopp hett. So is dat ümmer, wenn einen einen Infall hett un ein anner wat dorut måkt-Bi disse Målbaukgeschicht seihn die einen dat Geld, dat dormit tau måken is, anner seihn in’t Utmålen von Biller dat Middel för dei Spyche, för Geist un Seel, dormit dei, dei noch arbeiten mœten, bäten sachter pedden un dei, dei œwer dit Öller rut sünd, in’n Kinnergorn för olle Lüd noch wat tau daun hemm’.

Œwer mœt allens ümmer för orrer gägen wat sien un kann dei Minsch nich sülben bestimmen, wat em gaut orrer nich gaut deit? Mœt man dat Utmålen so orrer so düden? Dat Utmålen måkt villicht utwussen Lüd ganz einfach puret Vergnäugen, dor’s as lütte Kinner all giern wat utmålen wullen un wägen lege Tieden nich dortau kåmen sünd. Nu hålen’s nå, wat inne Kinnertiet nich mœglich wier. Um warüm süll dat för utwussen Lüd kein Målbäuker gäben wenn’t all hüt för Kinner so allerlei Tiedungen gifft!

 


zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Kommentare

Leserkommentare anzeigen