zur Navigation springen
Güstrower Anzeiger

17. August 2017 | 05:40 Uhr

John Brinckman : Peter Lurenz bi Abukir

vom
Aus der Redaktion des Güstrower Anzeiger

SVZ-Serie zum 200. Geburtstag des plattdeutschen Heimatdichters John Brinckman / Behrend Böckmann stellt die Werke Brinckmans vor (letzter Teil)

John Brinckman makt denn schnurrigen Peter Lurenz, denn dat wull würklich as ’n Rostocker Unikum gäben hett, taun Titelhelden von sien allergröttst Loegen- un Spaßgeschicht, dei in’t Johr 1868 as letzt Geschicht vör Brickman’s Dod rutbröcht wür. Soväl Seemansgorn wür in kein anner Geschicht spunnen un spälen deit allens in denn Kräuger Block sien Wirtschaft, wo Peter Lurenz em tau later Stunn’ dei Beläwnisse mit sienen Duzfründ Kaptein Nelson inne Schlacht bi Abukir vertellt. Disse Schlacht hett dat würklich gäben. An’n 1. un 2. Austmand 1798 hett dei inglisch Flott ünner Kaptein Nelson unvermaudens bi Akubir inne Neech von Alexandria dei Flott von Napoleon dull tausett’t. Admiral Brueys süll dat fanzöösche Expeditschonheer na Ägypten bringen, oewer 5000 Franslüd hemm’ in disse Seeschlacht denn Dod funnen un Ingland harr sik dei Herrschaft in’t Middelmeer säkert.

„Seihn Sei Herr Block“ secht Peter Lurenz ümmer wedder, wenn hei sien Läuschen vertellt. Dat ierst is wull, dat hei sik son’n lütt bäten up dei Nautik schmäten harr un em „ein grot Knuppen von de Membranen in dat Cerebrum“ rieten süll för ’n Erfinnung, dei sik seihn laten künn „as Sir Eisack Juten sin Doktrin von den universalen Sworpunkt un Leibnizen sin Differentialkalkulus un dat swore Gesetz von dat Deklinatorium Magnetikum“.

Un so makt hei Block klor, dat bei em dei Brägenknuppen räten is un dei Navigatschon dörch sien „horizontale Peilung un den submarinen Pegel mit den duwwelten Sneller“ ’n groten Schupps bet in’t neechste Johrdusend krägen harr.

Hei stünn nu näben Keppler un Kopernikussen un behüll nicks vör sik, sogor in’t „Observatorium von Grienitsch“ wür hei bekannt.
Nadem hei Block sien Erfinnung verklort harr, vertellt hei wieder, dat hei inne Middlannsche See „an Buurd von de Amsterdamer Kuff, de Kaatje Naatje...as Amatüre vor de Nautik...wegen de Peilung un den bewussten Pegel mit den duwwelten Sneller“ wier, dat hei in Smyrna Druwrosinen för Rotterdam laden harr un Napoleon sik „grad sonn bäten achter dat Delta von den Nilus in Egypten“ uphöll. Un inne Gägend von Malta kümmt em Nelson sien Armada inne Moet, dei Englänner visitieren dei Amsterdamer Kuff un as sik Peter Lurenzen as dei vonne horizontale Peilung ut Rostock tau erkennen gifft, wür hei gliek tau Nelson bröcht. „Dat künn gor nich bäter drapen“ secht nu Lurenzen tau Block un hei höllt allens för erstaunlich un stamelt blot, „dit is wohrhaft Erstaunen erregend, Herr Lurenzen! Un wenn dat nich ut Sei Ehren eigen geihrten Mund kamm- “.
Block kriecht denn noch tau weiten, wat Lurenz un Nelsen - sei sünd all Duzbräuder – sik allens so vertellt hemm’. Block weit nu ok, woans Nelson ein Och verlurn hett un em dei anschaten Arm mit ’n Fuchschschwanz afsacht wür.

Dei Fründschaft geiht so wiet, dat Lurenzen von Nelson taun Meddachäten bäden ward. Dat gifft tau Rostbeef un Plumpudding gauden Sekt un Lurenzen lött denn Nelson weiten, dat dei „fransche Admiral (...) sich wohl noch da unten bei dem Nilus ein bisschen aufhalte“. Un so secht Peter Lurenz denn tau Herrn Block: „De Annalen von de Welthistorie (...) de moeten nu seggen: Peter Lurenz hett de Slacht bi Abukir gewunnen, man betahlen hett hei sik dor nich för laten.“

Un so discht Peter Lurenz sienen Kräuger Block ümmer niege Läuschen up bet Block ut Verseihn dat Licht utpusten däd. Ierst dunn güng Lurenz na Hus un Block „schott’t oewersten sin Husdör achter Herr Peter Lurenzen sihr vörsichtig tau, slöt tweimal dat Slott af un tröck de iesern Stangen dwas vör“. Un Block deit dat’n lütt bäten leid, dat all dei annern von’n Stammdisch disse Geschicht nich hürt hemm’.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen