zur Navigation springen
Güstrower Anzeiger

24. November 2017 | 21:41 Uhr

Fierdach för de Katten

vom
Aus der Redaktion des Güstrower Anzeiger

All dei sik mit Katten afgäben, hemm’ siet ’n por Johr ok ehrn Fierdach, denn Weltkattendach an’n 8. August! As ik lütt wier, geef dat ok Katten up unsen Hoff. Sei harrn kein grötter Anseihn as Kauh un Schwien, as Gant un Schap. Un so as dei Häuhner mit tuck-tuck raupen würn, keemen dei Katten bi miez-miez an ehr Frätnapp ünner dei Waderbänk inne Koek. Un dor fünnen sei dat, wat von’t Meddachäten nabläben wier. Up’t Kannapäh un inne Bedden harrn dei Katten ok nicks tau säuken. Ehr Revier wier dei Gorn un dei Wisch achter’t Hus orrer dei Kuurn- un Heuboen, wo’s as Musjäger ünnerwägens wiern. Un wenn’t mal dull kolt wür, künnen’s vonne Schündäl ut in’n warmen Kauh- orrer Schwienstall rinnerwutschen. Keinein hett dunnemals an’t Kastrieren dacht, dei Katt süll Katt blieben un dei Geburtenrägelung wür vörnahmen up’n Oort, dei so hüt nich mihr moeglich is.

Hett ’n Katt dei Küken jacht un fräten, denn wür ok mal korten Prozeß makt un ehr dat Fell oewer dei Uhren treckt un fien garwt. So keem man taun Kattenfell, dat ’n gägen allerlei Weihdach verwennen künn.

Vertellt ward, dat in Hunger- un Kriegstieden ’n Katt as Dackhaas up’n Töller lannt is un vertellt ward wiederhen, dat Ganoven in Asien Katten as Hasen verköpen un dei Verköper hüt ut dissen Grund Kaninken ümmer mit’n Pot anbeiden moet. Katten warden in China, Vietnam un Korea, oewer ok in Peru, England un Niegen Seeland un inne Toscana äten. Siet 2010 is dei Hannel mit Kattenfleisch in Dütschland un dei Hannel mit Kattenfellen inne EU verbaden.

Kattenfrünn’ wullen nich mihr länger tauseihn, woans Katten malträtiert würn, un hemm’ na un na dei Katt von’n Husdiert in’n Fomilienmitglied ümwannelt.
Hüt warden in Dütschland bummelig bäten mihr as 8 Milljonen Katten hollen. Katten liggen dormit up Platz 1 vör dei Hunn’ mit ca. 5,5 Milljonen.

All disse Katten sünd kein Musjäger mihr, sei moeten sik nich mihr sülben so as dei twei Milljonen versorgen, dei noch in Düütschland ümherströpern un kein Tauhus hemm’.

Nich mihr dat Kattenfell, sonnern dei Katt sülben helpt gägen Weihdach. Sei schnurrt un kuschelt un dat deit gaut, sei schlöppt an’n Dach un geiht up’t Kattenklo, sei is eigensinnig un hürt nich so as’n Hund. Liekers sünd Katten denn Dütschen sien leiwstet Kind. Sei sallen 1,5 Milliarden € in’n Johr für Kattenfauder un annern Kram utgäben un so bannig väl för all dei Höker daun, dei mit Katten ehr Geld verdeinen.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Kommentare

Leserkommentare anzeigen