Voß mücht wat oewer denn’ Globen weiten

svz.de von
09. Dezember 2013, 00:33 Uhr

Voß sitt anne Grabenbuurd, mit’n dick Bauk inne Vörderpot un blädert. Kümmt Haas vörbi un seggt: „Gauden Dach, Voß. Man, so mit’n Bauk vör de Näs heff ik Di noch nie nich seihn. Segg mal, wat lääst Du dor?“ Voß kickt up. As hei denn’ Haas süht, röppt hei: „Hallo Haas, Du kümmst mi grad recht. lk kann dat hier inne Bibel nich finn’, heff von vörn bet hinnen all alls dörchkäken.“ Haas grient un seggt: „Voß, Du un inne Bibel läsen. Söchst Du dor villicht n’fett Hauhn in?“

„Nee, nee, ik mücht wat oewer denn’ Globen weiten“, seggt Voß. Haas lacht: „Dorvon steiht doch de ganze Bibel vull!“ Voß oewerlecht. „Ja, dat mach woll sien. lk har man giern wüsst, wat de Politikers in Schwerin för’n Globen hemm’.“ „Och, de Mihrsten dorvon
sünd woll kathoolsch orrer evangelsch“, seggt Haas. „Haas, verstah mal recht. Nu sünd doch bi uns werrer Wahlen. Un ik as Voß bün doch ahn Globen. Nu mücht ik einen wählen, de globensmäßig tau mi passen deit. Wat hest Du denn för einen Globen, Haas?“

„Ik? Denn’ sülwigen as uns Ministerpräsdent. Blot, de hett körtlich de leiwen Hasen mit de bösen Voß vergläken. Nu möt hei nich glöben, dat ik em liekers wählen dau“, seggt Haas. De Voß lacht: „Wenn’t sö is Haas, denn passt hei globensmäßig woll an’ besten tau mi!“





zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen