zur Navigation springen
Neue Artikel

20. November 2017 | 08:59 Uhr

Plattdütsch lernen

vom

svz.de von
erstellt am 20.Mär.2012 | 11:34 Uhr

Inn Glückspott grepen het de, de tau Hus nedderdütsch snacken liernt, wo Grotöllern un Öllern platt mit em snacken un hei disse Sprak gliksam mit de Muddermelk insögt. Äwer dit Glück hebben hütigendachs nich mihr väl Kinners, un dat warden ok in Taukunft nich mihrer, ihrer dat Gägendeel! Äwer dat gifft ok anner Wäch, so üm een por Ecken rümmer. So as bi mi.
Asn lütt Butscher von nägen Johr wier ik nah Mäkelborg kamen und verstünn – nix. Wenn uns oll Nawersch, Fru Ziemann un Fru Pagels, luthals dörcht Treppenhus schladdern orrer rümzackerieren deden, wieldat wi mal wedder tau lut orrer mit schietig Stäbels dörcht Hus lopen wiern, denn stunn ik dor mit apen Mul un heww dösig kiekt. Laterhen hew ik liernt dat tau verstahn, wat de oll Frugens von mi wullt hebben. Äwer dat mit denn Snacken, dat fung ierst in de Schaul an, bäter seggt, in der Richard-Wossidlo-Oberschaul in Waren. Richard Wossidlo (1859 - 1939), de oll Perfesser Vosslo – so hebben de Lüüd em tau sien Läwtieden näumt – het hunnertdusende plattdütsche Wüürd sammelt un up lütte Zettels upschräben. Dat wier so väl, dat sei ok hüt noch an de Uni Rostock mit oll Wossidlos Zettelkram tau dauhn hebben. Wieldat Wossidlo uterdem an disse Schaul in Waren Lihrer wäst wier, stünn Plattdütsch hier hoch inn Kurs. Und dat wier tau disse Tieden – de Enn von de föfftiger Johren – nich öwerall so.
Dor hebben wi inn Schaulchor plattdütsch Leeder sungen. Dor wür plattdütsch Theater spält, un eenmal hebbens mi ok eens mitspälen laten. Dat wier „De Rahnstädter Reformverein“ ut Reuters „Stromtid“. De Seel von dat plattdütsche Läben wier uns Lihrerin Fru Groth. De verstünn dat, ehr Leef tau dat Plattdütsche up uns jung Lüüd tau öwerdrägen. Een grotorrig Fru! Wenn dat in jedeen Schaul so een Lihrerin gäwen ded, denn wier mi üm de Mäkelborgsche Muddersprak nich bang. Richtig tau bruken wier dat Plattdütsche för mi denn later nah denn Abitur upn Dörp. Dor sull ik mi inn Ackerbu „bewähren“. Un up den Acker würd platt snackt. Wecker dor mit hochdütsch keem, de würd als hochsnutig anseihn un ok so behannelt. Also hew ik platt snackt, jedeen Dach. Un so is dat bi lütten mien wurden. Tau dat Snacken keem dat Läsen un laterhen denn ok dat Schriewen. Doch doröwer dörben wi dat Spräken nich vergäten: denn Platt will snackt sien.


zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen